Arubatopia

Monday, March 20, 2006

"Lagami duna bo Biologie Voortplanting Praktijk" Maestronan cu tin relacion intimo cu nan alumnonan.



Riba internet mi a topa un articulo caminda un huez mericano ta conseha maestronan pa no haci sex cu nan alumnonan. Esaki ta algo cu bo ta bisa "di mes cu no", pero mirando e lista largo di maestranan cu a haya problema cu ley, mi ta comprende di con e huez a duna e remarke aki. Tur e educadornan riba e lista aki ta hende muher, pero esaki ta socede cu hende homber tambe.http://worldnetdaily.com/news/article.asp?article_ID=49169

Na Aruba tampoco ta desconoci cu maestronan tin relacion intimo cu nan alumnonan, solamente e casonan aki no ta sali na dia cla pa motibonan desconoci. Ami den conversacionnan cu hobennan mi a saca afor cu e ta socede, den algun scolnan secundario, den esakinan tambe casonan di relacion homosexual. Poco tempo pasa un instancia social a saca den su programa informativo tocante "Sugar Daddy" cu nan ta conta maestronan tambe den nan.

Ami mes ta un futuro maestro y loke e huez ta bisa ta loke e director di e scolnan secundario caminda mi a stage ta consehami tambe. Un relacion entre maestro y alumno ta solamente problemanan lo trece. Pa di prome, bo tin un relacion di trabou, y esaki lo perhudica e relacion aki. Ademas bo ta cu un menor di edad, y problemanan lo cuminsa si e mayornan lo mester haya sa. Ta importante como maestro no cai den tentacion y resisti y para firme contra cualkier acercamento inapropia ( kiermeen worde seduci) door di e alumnonan mes.

Mi a studia pa Trahador na Bienestar Social y prome cos cu nan ta siña nos ta e codigo caminda nos ta prohibi pa tin un relacion intimo cu nos clientenan. Psycologonan tambe ta haya e codigonan caminda nan mester tene nan mes na dje.Pero na IPA te dia di awe mi no a mira niun codigo pa maestronan sostene pa Ley.
Como maestro bo mester ta un ehempel pa e hobennan, pero no bira parti di e libertinahe y decadencia moral cu ta bibando bou di nos hobennan actualmente.

Wednesday, February 01, 2006

Den T*nt* di nan M****

Awe Diaranson den Bon Dia Aruba "Nos isla ta birando blanco riba internet cu avisonan ficticio riba caso Holloway. Ta sugeri cu companianan Hulandes liga cu Alabama lo boicotea Aruba tambe. Tambe ta publicando avisonan propagando Aruba como destinacion Holloway.

Ta ken c*** e Mericanonan aki ta kere cu nan ta? Si e companianan Hulandes haci esaki anto si ta berdad, anto di berdad mes cu Hulanda ta e cacho di Merca.

check e co'i t**** aki: http://www.cspnv.com/PDF/01/AO1-02-2006.pdf

Tuesday, January 31, 2006

Un tormenta/tormento


Pober, Aruba. Diosa Natalee lo tormentabo pa semper. Check e post di e blog di e culto di Holloway/Twitty. http://www.scaredmonkeys.com

Pakico yam'e monumento anto? (Part 2)



Esaki ta otro di nos monumentonan na Wilhelminastraat/Zoutmanstraat. E edificio aki tabata na fin di siglo 19 e prome scol publico di gobierno, despues den añanan 50 el a bira un Biblioteca Publico. Acutalmente e ta bou di restauracion.

Kico a pone cu mester a bin un restauracion asina drastico? Mi lo mester ta for di noticia. Tempo cu mi a bai Puerto Rico na Viejo San Juan, mi a bishita un scol di Teatro yama Jose Julian Acosta. E scol aki tabata traha of ta riba un lugar historico. E scol mester pasa pa motibo di esei den henter un proceso prome cu e "pone algo aserca". Kico tabata e proceso pa e restauracion? Dicon e monumento aki tin mas balor cu esun cu mi a menciona caba y mester restaur'e? E edificio aki ta casi parti den dos aworaki y trabounan ta andando akinan.

Pakico yam'e monumento anto?




Esaki ta un di nos monumentonan historico, Balashi Gold Mill cerca di Rooi Frances. E monumento aki ta importante y di balor historico, pasobra e ta conta e "Periodo di Oro" di Aruba den siglo 19 te cu principio di siglo 20. Balashi Gold Mill a cuminsa funciona den fin di siglo 19 reemplazando e funcionnan di Bushiribana Gold Mill. E tabata conecta cu un di e minanan principal na Miralamar. Via rails un tipo di trein chikito, yama trekinchi (for di Ingles: : "traction engine.") tabata transporta e oro pa e "fabrica" aki. Posibelmente esaki lo tabatin su mesun laboratorio y sistema di energia.

Lamentabelmente e lugar aki a conoce destruccion den e ultimo decada di siglo 20. Personanan cu a kibra cierto partinan di e lugar y a expone un pos masha hundo mes banda di e parti pariba. Posibelmente e lugar lo a conoce un destruccion caba, tempo cu tabatin plannan pa pone un golf course, museo y restaurant mas o menos na aña 1986. Poco tempo pasa a drecha y haci limpieza y mantencion di e lugar, cerrando tambe un caminda di tera cu ta conecta cu e caretera principal cerca di e brug di Spaans Lagoen. Ultimo tempo personanan cu ta bishita ta tira hopi sushi banda di e ruinanan, e matanan a crece y no tin mantencion mas. Prome bo tabata haya bari di sushi di Total Cleaning pero awor e regenbak a bolbe bira e bari di sushi. Ademas hende ta dump saconan di sushi den e mondi cerca di e entrada di e lugar aki. Sushi ta bula bai, y ta causa molester pa e bisiñanan den cercania. Un par di dia pasa hasta tire nan a kima banda di e baki aki. Ademas e militarnan ta tene nan trainingnan frecuentemente einan.

Turista tanto den jeep tours como quadracers ta bishita e lugar aki pasobra e ta un lugar historico y ta keda den cercania di Rooi Frances y Spaans Lagoen cual tin un di e gran rikeza di Fauna y Flora local y di afo. Sinembargo e lugar aki ta reconoci como monumento pero e no ta worde cuida, manteni, ni protehi. Ta ken su responsabilidad esei? Esei ta responsabilidad di nos mes como Arubiano pa cuida nos patrimonio y tambe di nos Monumentenbureau y Park Rangers.

Si nos no kier cuid'e, nos no ta preocupa cu esaki, anto no yam'e Monumento anto.

Monday, January 30, 2006

Macaconan kier Banana Rubiano?



Un blog cu yama Scared Monkeys a haya ta bon di lastra e nomber di e Aruba pa e placer di e fanaticonan racista y simpatisantenan di Beth Twitty, mama di e desaparecida Natalee Holloway. E blog aki ta of tabata forma parti di un cooperacion di blognan yama Blogs for Natalee. E blog aki tin hopi tempo ta pone noticianan di Aruba, di atraco te cu destruccion di e santana na Playa. Tur esaki cu e solo motibo pa convence mas hende pa sigui cu e boycott pa Aruba. Pa mustra e mundo cu Aruba no ta save, cu nos ta hendenan corrupto y cu no ta existi husticia. E Macaconan Miedoso ta kere ademas cualkier cos cu e periodistanan di awa dushi tanto local como mericano ta inventa y ta bende esaki pa su fanaticonan. Loke e Macaconan aki ta mustra ta e banda scur di Aruba, sin mira e tantisimo crimennan no resolvi den nan mesun estado.

E rabia horibel cu e hendenan di Scared Monkeys tin contra Aruba ta inexplicabel. Akinan bo ta anda cu hendenan hopi frustra, cu tin un intolerancia enorme, cu fusenan cortico y hopi di nan comentarionan ta bin cu un tono racista cu ne. Henter e caso di Natalee Holloway a bira un circo, esei cualkier hende por saca afor. Ya no ta trata mas di e pober mucha muher aki, sino el a bira un wega di politica, fama y ratings.

Shonnan, di un banda e Mericanonan a señala algo cu nos di basta aña tabata grita, e trabou di nos Cuerpo Policial, nos leynan Hulandes y cu no a percura pa drecha e problemanan social di Aruba pero a sigui inverti bai den turismo. "Aruba a bende su alma na e turismo Mericano, e diabel", segun un observador stranhero a bisa. Esaki lo por ta nos castigo?

Mientrastanto laga e Macaconan aki come nos banananan putri di noticianan, cual nan ta gusta un mundo, y laga nos spera cu husticia prevalece y cu nos Aruba por sali for di henter e trasteria aki. Check e: http://www.scaredmonkeys.com

Bon Bini/Welcome


Bon Bini na mi humilde Blog. Boso servidor Angelo Angela lo purba di mantene boso altanto di e ultimo noticianan di nos dushi Aruba. Tambe sinti boso mes liber di expresa boso mes aki riba. Aruba di berdad ta un paraiso apesar di tur su problemanan. Pero akinan nos a nace, crece y biba. Pesei ban defende nos pida baranca principalmente for di e atakenan reciente di medionan di comunicacion mericano y di otro blognan cu ta haya ta bon di lastra e nomber di nos Arubianonan.